متاحة في
برو
الأوردر اللي بيستنى حد يمسكه بيتأكّد متأخر، والعميل اللي ما حدش كلّمه بسرعة بيلغي أو يشتري من مكان تاني. الإسناد التلقائي بيدّي كل أوردر جديد لموظف أول ما يوصل، من غير ما حد يوزّع بإيده.
الفكرة باختصار
فيه طريقتين بيشتغلوا مع بعض. الأولى «القواعد»: كل قاعدة ليها شروط وموظف، زي «أوردرات القاهرة تروح للموظف ده». الشروط ممكن تكون المدينة، الدولة، الفرع، شركة الشحن، طريقة الاستلام، طريقة الدفع، مصدر الطلب، حالة الطلب، إجمالي الطلب، كوبون، مصدر الزيارة، أو منتجات معيّنة. القواعد بتتفحص بالترتيب، وأول قاعدة تنطبق على الأوردر هي اللي بتتطبّق.
الطريقة التانية «التوزيع المتساوي»: أي أوردر ما طابقش أي قاعدة بيتوزّع على الموظفين اللي اخترتهم، كل واحد حسب «النصيب» بتاعه. واسم الموظف وسبب الإسناد بيتسجّلوا في سجل الطلب.
إمتى تستخدمها
- عندك أكتر من موظف بيأكّد الأوردرات وعايز الشغل يتقسم بينهم بالعدل.
- كل موظف مسؤول عن منطقة، أو فرع، أو شركة شحن.
- الأوردرات الكبيرة محتاجة موظف خبرة يتابعها بنفسه.
- عامل حملة بكوبون أو من مصدر زيارة معيّن، وعايز موظف واحد يمسك أوردراتها كلها.
لازم تعرف
- مين يستلم: الموظفين اللي دورهم فيه «تعديل» أو «تحكم كامل» على «الطلبات» بس. لو الصلاحية اتشالت من موظف، القاعدة اللي باسمه ما بتتطبّقش وما بيستلمش من التوزيع.
- النصيب: رقم من 1 لـ 100. موظف نصيبه 2 بياخد ضعف موظف نصيبه 1، والصفحة بتوريك نسبة كل واحد من مجموع أنصبة اللي «يستلم طلبات» شغّال عندهم بس، والموقوف نسبته 0%.
- أوردرات لوحة التحكم: الأوردر اللي بتعمله بإيدك من لوحة التحكم ما بيتوزّعش تلقائي. الإسناد على الأوردرات اللي جاية من المتجر.
- لو مفيش حد يستلم: لو مفيش قاعدة طابقت والتوزيع المتساوي فاضي، الأوردر بيفضل من غير موظف وتقدر تعيّنه بإيدك.
- مكانها: لوحة التحكم ← الطلبات ← زرار «الإسناد التلقائي للموظفين» فوق قائمة الطلبات. الزرار بيظهر للي عنده «تحكم كامل» على «الطلبات».
خد بالك: تعديلات التوزيع المتساوي ما بتتحفظش لوحدها — بعد ما تضيف موظف أو تغيّر نصيبه اضغط «حفظ التوزيع»، وإلا هتفضل «تغييرات لم تُحفظ».
