المميزات ← التكاملات وخدمات الشات
المخزن بتاعك شغّال على Odoo والموقع بيبيع من نفس البضاعة؟ من غير ربط، كل بيعة في المحل أو على الكاشير محتاجة حد يروح يعدّل كميتها على الموقع، ولو اتنسيت العميل بيطلب حاجة خلصت.
مزامنة المخزون مع Odoo بتخلّي الرقم واحد في المكانين: أي بيع على الموقع بينقص المخزون في Odoo، وأي بيع في المحل بينقص المخزون على الموقع.
بتربط حسابك في Odoo بعنوان الحساب واسم قاعدة البيانات وإيميل المستخدم ومفتاح الربط، وتختار المستودع اللي مبيعات الموقع بتتخصم منه. المنتج بيتربط بنظيره عن طريق رمز المنتج (SKU): نفس الكود في الموقع وفي Odoo يعني نفس المنتج، ومن ساعتها كمية Odoo هي الكمية المعتمدة.
بعد الربط، أول ما حالة أوردر على الموقع تبقى «مكتمل» كميته بتتخصم من Odoo على طول، ولو أوردر «مكتمل» اتحوّل لـ «مسترجع» الكمية بترجع. وحركات Odoo نفسها — بيع، مرتجع، شراء، تحويل، أو تعديل يدوي — بتوصل الموقع خلال دقيقة تقريبًا. ومرة كل يوم كل الكميات المربوطة بتتظبط على أرقام Odoo، عشان أي حاجة فاتت تتصلّح لوحدها.
وأول مرة بتختار بزرار واحد: «من Odoo» بيربط المنتجات ويجيب الأصناف اللي على Odoo بس ويضيفها للموقع، و«إلى Odoo» بيضيف على Odoo منتجات الموقع اللي مش موجودة عنده بكمياتها.
خد بالك: عشان بيع الكاشير يوصل الموقع على طول، اختار «في الوقت الفعلي» في إعداد تحديث كميات المخزون بنقطة البيع جوه Odoo. وقبل أول مزامنة ظبّط الأكواد في الناحيتين، لأن «من Odoo» بيضيف للموقع كل صنف مالقاش له كود مطابق ويظهر في المتجر على طول من غير صور.
