المميزات ← التكاملات وخدمات الشات
بتبيع من نفس البضاعة في المحل وعلى الموقع؟ من غير ربط، القطعة اللي اتباعت في المحل بتفضل ظاهرة متاحة على الموقع، والعميل يطلبها وإنت ماعندكش منها — أوردر بيتلغي وعميل مش راجع تاني.
مزامنة المخزون مع دفترة بتخلّي الرقم واحد في المكانين: أي بيع على الموقع بينقص المخزون في دفترة، وأي بيع في المحل بينقص المخزون على الموقع.
بتربط حسابك في دفترة باسم الحساب ومفتاح الربط، وتختار المستودع اللي مبيعات الموقع بتتخصم منه. المنتج بيتربط بنظيره عن طريق رمز المنتج (SKU): نفس الكود في الموقع وفي دفترة يعني نفس المنتج، ومن ساعتها كمية دفترة هي الكمية المعتمدة.
بعد الربط، أول ما حالة أوردر على الموقع تبقى «مكتمل» كميته بتتخصم من دفترة على طول، ولو أوردر «مكتمل» اتحوّل لـ «مسترجع» الكمية بترجع. وحركات دفترة نفسها — بيع، مرتجع، شراء، تحويل، أو تعديل يدوي — بتوصل الموقع خلال دقيقة تقريبًا. ومرة كل يوم كل الكميات المربوطة بتتظبط على أرقام دفترة، عشان أي حاجة فاتت تتصلّح لوحدها.
وأول مرة بتختار بزرار واحد: «من دفترة» بيربط المنتجات ويجيب الأصناف اللي على دفترة بس ويضيفها للموقع، و«إلى دفترة» بيضيف على دفترة منتجات الموقع اللي مش موجودة عندها بكمياتها.
خد بالك: «من دفترة» بيضيف للموقع كل صنف في دفترة مالقاش له كود مطابق، ويظهر في المتجر على طول باسمه وسعره من دفترة ومن غير صور. ظبّط الأكواد في الناحيتين الأول، وراجع المنتجات الجديدة بعد أول مزامنة.
